— 12 —
Sahabisnja dahar, Siauw-tjhit laloe sediaken itoe barang-barang goena sembajang, sedeng arak, lilin, hio dan sabaginja tida katinggalan.
Sasoeda ini semoea ditaro dalem tampat kerandjang, Siauw-tjhit bersama doea orangja jang biasa membantoe dalem pakerdjahan menangkap ikan, Sore-sore lantas tidoer, soepaja di hari esok bisa bangoen lebi pagi.
Satoe malem telah berlaloe.
Esok pagi sabelonnja terang tana ini orang gaga lantas bangoen, dan itoe barang sembajang jang ditaro dalem ampat kerandjang laloe dipikoel oleh doea pengikoetnja kadalem praoe. Dan sabelonnja berangkat, Siauw-tjhit bri taoe doeloe pada iboenja, kamoedian baroelah ia kaloear pintoe.
Dari sini ternjatalah, maski Siaw-tjhit itoe ada saorang aseran jang beradat kasar, toeh pada orang toea ia amat berbakti. Sagala perboeatan ia tida brani melantjangi, sabelon dapet perkenannja itoe iboe.
Satenga djam telah berlaloe.
Tatkala itoe soeda terang tana. Sinarnja matahari jang baroe naek di djoeroesan Timoer, ada kaliatan sabagi bola-bola ani jang menggeboer-geboer menjinarken tjahajanja ka-saloeroe doenia. Papoehoenan dan goenoeng-goenoeng jang kaliatan dari kadjaoean, terpandang indah sekali.
