— 325 —
Koei-tjoan tida maoe ambil perdoeli sama itoe segala bitjara perhiasan, tapi lantas berkata lagi:
„I ja bagimana?-apa oewa Boen-hoei taoe jang goea soeda bikin roesak sama si Bok-hiang?“
„Kaga, sebab itoe anak soeda engga maoe bi-tjara satoe apa,“ djawab Boen-san „Betoel kan begitoe, Djambroet?“
„I ja, ditanja-tanja djoega dia engga maoe ngo-mong satoe apa,“ saoetnja itoe bekas tjomblang.
„Kasian betoel liatnja, ba Koei-tjoan.“
„Habis apa oewa Boen-hoei engga nanti djadi tjemboeroean kaloe dateng-dateng kasi oewang saban boelan sama dia?“
„Engga, masa ja dia begitoe koerang trima.“
Koei-tjoan berdiam lagi sabentaran, kamoedian laloe ia berkata:
„Soeda da, sekarang goea poelang sadja.“
Habis bitjara laloe ia berbangkit, dan berdjalan kaloear, tapi baroe sadja pintoe diboekah, lantas djoega kadengeran soera orang menangis jang amat sedih. Itoe adalah sesambatannja njonja Boen-hoei jang soeda ditinggal anaknja.
Koei-tjoan, Boen-san dan Djambroet lantas ber-tindak kaloear, dan sigra djoega iaorang dapet liat, jang di pertengahan roemahnja njonja Boen-hoei soeda berkoempoel banjak orang. Satoe lelangse mait soeda dipasang, satoe tanda jang Bok-hiang soeda brangkat ka acherat bersama kandoengannja.
