— 326 —
Tapi itoe samoea tida membikin tergerak barang sedikit hatinja itoe tiga orang, jang sabenarnja ada taoe betoel apa sebab si nona soeda binasaken djiwanja.
Seperti orang awasken barang permaenan, be-gitoelah Koei-tjoan soeda toedjoeken matanja ka itoe roemah kamatian, dimana segala apa pantes-nja bisa bikin orang djadi toeroet merasa sedih. Djoega Boen-san, jang tadi soeda kasi oendjoek dirinja seperti pembelah dari Bok-hiang, sekarang ini haroes dibilang jang aer moekanja lebi banjak mengoetaraken goeratan senjoem dari pada peng-rasahan piloe.
Djambroet lantas pergi koendjoengin roemahnja itoe orang kasoesahan, jang sabagimana biasanja diseboetken orang, adalah boeat menengokin dan membantoein. Tida sabrapa lama lagi Koei-tjoan lantas berdjalan poelang.
Tatkalah soeda ada sendirian sadja, Boen-san laloe berkata dalem hati:
„Sakali ini kenahlah goea djoewal sama loe. Kaloe loe engga kasi saban boelan lima poeloe, hati-hatilah; kaloe loe kasi boleh dibilang roemah goea nanti djadi basa djoega. Masa goea maoe begitoe bodoh!-paling banjak djoega goea nanti kasi sa-poeloe roepiah boeat oewa Boen-hoei jang anaknja mati, dan goea nanti bilang, goea jang poenja moera hati kasi itoe sama dia.“
