— 168 —
Ban-tjoan, jang memang sadari tadi belon boekah pakean, lantas pergi djalan-djalan ka pasar malem dengen hati amat girang.
Sasoeda merasa tjapeh ider-ideran, laloe mampir di soeatoe roemah-makan, dimana dengen ajal-ajalan ia djedjal peroetnja sampe pas betoel, dan koetika ia kaloear lagi dari sitoe horlodjinja soeda menoendjoekin poekoel sapoeloel satengah.
Dengen mendadak Ban-tjoan poenja hati lantas berdebar-debar lebi keras dari jang soeda-soeda, dan oleh kerna kwatir nanti djadi terlaloe laat, sigra ia menoedjoe ka Gang Lamtjeng, dari sitoe teroes ia pergi ka oedjoeng Gang Kampoeng Opak jang berwatasan dengen Gang Patike dan Gang Togee.
Koetika itoe plahan-plahan langit moelahi djadi mendoeng kombali. Ban-tjoan tarik napas pandjang, kamoedian laloe menggrendeng pada diri sendiri :
„Kaloe sampe toeroen oedjan goea belon djoega ada jang soesoelin, kasi taoe jang goea lantas boleh pergi katemoein, betoel-betoel goea poenja peroentoengan boleh dibilang ada tengik sekali. Kaloe badjoe goea sampe djadi basa dan goea djadi kadinginan, bagimana boleh djadi enak ? Ah, tjilaka betoel, pengabisan tjilaka kaloe diliat begini !"
Sapoeloe menit berlaloe, dan sigra djoega soeda toeroen oedjan grimis. Ban-tjoan kretakin giginja
