— 167 —
Di tengah perdjalanan ia anmbil kahar, dan laloe prenta koesir bawa ia ka pasar malem.
Sasoeda tjapeh ider-ideran, ia laloe poelang ka roemahnja. Koetika itoe lontjeng baroe mengoe- taraken poekoel tiga lohor. la doedoek-doedoek, djalan kaloear-masoek, rebahken diri dan batja sedikit boekoe dongeng pada bagian jang ia paling soeka.
Tatkalah lontjeng mengoetaraken poekoel anam, lantas ia pergi ka kamar mandi boeat bikin bresi badannja, dan sasoeda berpake pakean kombali laloe ia doedoek bersantap, tapi baroe sadja ia maoe brangkat boeat ider-ideran poelah di pasar malem, dengen mendadak oedjan lantas toeroen seperti ditoewang-toewang.
„Ini oedjan betoel engga taoe atoeran," kata Ban-tjoan dalem hati dengen sedikit sengit. „Kaloe samentar poekoel sabelas liwat ia toeroen begini besar, bolehlah goea alem sama dia, tapi ini betoel seperti dia adjakin goea bermoesoehan ; betoel koerang adjar sekali !"
Kamoedian laloe ia banting-banting kakinja salakoe orang jang soeda tida berdaja lagi.
Tapi sang oedjan tida maoe bikin ia sakit terlaloe lama. Kira-kira poekoel delapan satengah ia poenja toeroen soeda djadi samingkin koerang lampias dan koetika lontjeng mengoetaraken poekoel sambilan, langit soeda djadi terang kombali.
