— 169 —
lantaran merasa amat gregetan, kamoedian laloe ia berdjalan moendar-mandir seperti klakoeannja singa jang sanget boewas.
Plahan-plahan oedjan toeroen samingkin deres. Ban-tjoan merasa kawalahan boeat manda badannja disiremin aer. Laloe ia berkata dengen sengit :
„Kaloe liat begini gelagatnja samoea tentoe misti djadi gagal boeat di ini malem. Apa mengkali goea engga ada poenja oentoeng boeat dapetin dia, mangkanja sampe ngalamin begini soesa, begini sangkarat ?"
Kamoedian laloe ia maoe brangkat pergi menoedjoe ka Gang Patike, tapi baroe sadja ia bertindak bebrapa langka, satoe orang soeda lantas pegang tangannja seraja berkata:
„Maoe ka mana ? Sekarang baba boleh ikoet saia, mari !"
„Koerang adjar! Kamana loe soeda ngentjap kasi goea kaoedjanan di sini ?"
„Sekarang kan belon poekoel sabelas ? Tong- tong djoega belon boenji. Oedjan toeroen betoel saia lagi berbenah; lantas saia boeroe-boeroe ka mari samperin baba, takoet baba nanti djadi kabasahan."
Koetika itoe Ban-tjoan poenja rasa empat sama sekali soeda djadi terganti dengen rasa girang sabesar laoetan, pada waktoe mendenger jang ia sekarang boleh pergi mengoendjoengin, dari itoe manalah ia ada poenja sempat boeat kaloearken banjak-banjak
