— 125 —
satoe mira jang toelen ! Boeat loe poenja boedi jang manis goea sekarang maoe kasi loe presen.“
Sambil kata begitoe Ban-tjoan boekah dompetnja dan kasi satoe talen pada Mira, tapi prampoean itoe lantas berkata dengen sembeweken bibirnja:
„Nah, inilah presenannja orang jang manis boedi pada ba Ban-tjoan: belih kembang adja djoega takoetin engga wangi !“
Koetika itoe dateng lagi doewa anak moeda di itoe pertengahan, dan berbareng dengen itoe Han-leng lantas berseroe:
„Nah, sekarang kita ada poenja tjoekoep teman-teman; apa ada jang paling baek kita berboeat ?“
„Perkara begitoe misti kita poenja twako jang poetoesin; dia salamanja ada lebi bisa pikirin apa-apa jang bagoes,“ kata It-ban.
„Tapi goea sekarang maoe serahken sama Kai-siok, biar dia jang pilih, bagimana paling baek kita berboeat di ini hari Minggoe,“ kata Ban-tjoan.
„Dan goea maoe ada satoe bitjarahan lebi doeloe," kata Kai-siok. ,Eh, apa loe samoea soeda pada taoe, teman-teman, jang di Gang Togee ada satoe bidji jang di sini engga ada jang bisa bandingin ?“
„Itoe samoeanja kita soeda taoe,“ djawab bebrapa anak moeda dengen berbareng.
Jang laen-laen pada tertawa, malaenken Bantjoan dan Sin-tjoan tinggal tarik moeka soenggoe-soenggoe.