— 117 —
Sang istri meliat itoe klakoean, tinggal berdiam sampe sakoetika lamanja, tapi boekan sekali lantaran napsoe amaranja soeda djadi habis kaloe ia sekarang berlakoe demikian. Seperti satoe dewi jang kaloearken angin besar boeat roeboeken satoe poehoen, kaloe poehoen itoe mengilang dengen koenjoeng-koenjoeng, tentoelah dewi itoe nanti merasa amat penasaran, — dan begitoelah djoega ka'adahannja njonja Kek-soen di itoe waktoe !
Sasoeda sedar dari ia poenja kamemak, lantas ia mendjadi oering-oeringan sama samoea boedjangnja.
Sabenarnja, kaloe ditilik sadja dari bitjara dan tingka-lakoenja, apatah saorang seperti njonja Kek-soen nanti bisa berboeat laen ?
Sadari djelemah meliat ka'adahan doenia ia memang belon pernah kenal apa artinja pri boedi jang haloes.
Iboe bapanja sajang ia seperti moestika, menoeroeti segala apa ia poenja maoe, lantaran itoe djadi ia belon pernah mengenal djoega apa artinja orang mengalah dan bersabar.
Sasoeda masoek dalem oemoer bilang belas tahon, di banjak tempat ia terkenal seperti satoe gadis jang tjantik, dan koetika beroesia lima belas ia menikah sama Kek-soen, poen soeami itoe soeda pernah menjajang sanget padanja. la malaenken perloe kaloearken prenta, kamoedian samoea nanti
