— 116 —
„Ai, saoemoer goea idoep goea belon taoe dapetin prampoean begitoe bandel seperti loe ! Orang kata goea pergi moedik boeat oeroes kerdjahan, tapi loe engga laen maoe bergiat-giatan bilang goea piara bini moeda ! Apa loe taoe terang ? Siapa jang soeda bilangin sama loe, toewa bangka gila ?“
„Boeat apa loe tanja siapa jang bilangin ? Asal loe taoe jang goea soeda taoe loe piara bini moeda, itoe soeda tjoekoep, maoe apa lagi ? Apa loe perdoeli siapa jang soeda kasi taoe sama goea ? Loe brani kata kaga ? Loe kira goea engga taoe jang loe soeda piara orang baroe belasan tahon ? Toewa bangka engga taoe maloe, engga taoe diri ! — soeda dekat ka lobang masi maoe bikin anak prawan djadi kepiran !“
„Engga salah kaloe goea bilang loe ini ada kerbo boeta jang malaenken bisa menandoek kalang-kaboet ! Orang kasi mengarti boekannja loe dengerin, tapi loe berbalik tjowet-tjowet engga maoe brenti ! Soedalah, kaloe loe engga maoe mengarti orang poenja omongan, tapi teroes-teroesan bilang goea ada piara orang, baek, betoel-betoel goea nanti piara orang dan teroes engga poelang-poelang, soepaja traoesa hadepin loe poenja moeka jang sialan-dangkalan. Sekarang djoega goea maoe pergi, dan loe sekarang boleh riboet seperti gledek !“
Sambil kata begitoe Kek-soen berdjalan kaloear dan kamoedian teroes meninggalken roemahnja.
