Halaman:Kabesarannja Khong Hoe Tjoe.pdf/17

Dari Wikisource bahasa Indonesia, perpustakaan bebas
Loncat ke navigasi Loncat ke pencarian
Halaman ini tervalidasi

— 7 —

Dalem iapoenja salinan ada diterangken djoega bahoea Khong Tjoe „belon pernah ambil poetoesan lebih doeloe sabelonnja preksa doedoeknja sasoeatoe hal“, tapi Legge poenja antero sikep terhadep Khong Kauw menoendjoekken jang ia soedah ambil poetoesan bahoea dalem segala hal telah terboekti jang peladjaran Khong Kauw ada lebih rendah dari agama Kristen.

Ini pikiran jang koekoeh ada ternjata djoega dari tjaranja ia lakoeken itoe salinan. Ia selaloe anggep perkata'an Tionghoa ada mengandoeng artian tetep dan tida bisa dirobah lagi, hingga boleh dirèndèngken dengen satoe perkata'an Inggris jang saroepa maksoednja. Perkata'an jang mengandoeng artian loeas dan ,djaoe serta koedoe ditimbang satjara aloes boeat bisa bade toedjoeannja jang sedjati, ia sama sekalih tida perhatiken. Sedeng begitoe ada banjak perkata'an boeat membajangken pikiran orang Tionghoa jang sabenernja tida bisa lantes dirèndèngin atawa disamaken dengen salah-satoe perkata'an Inggris, tegesnja: tida bisa disalin dengen sampoerna katjoeali mengambil djalan memoeter kapan hendak meloekisken sari atawa soemanget dari itoe oedjar-oedjar. Djoestroe dalem itoe perkata'an-perkata'an jang mengandoeng artian sanget loeas ada tersemboeni poko dasar atawa sari jang paling aloes dari Khong Tjoe poenja peladjaran. Maka tiada heran apabila orang tida bisa salin dengen betoel maksoednja itoe beberapa perkata'an jang paling penting boeat mengenal peladjarannja Khong Tjoe, sa'antero oedjar dalem mana itoe perkata'an ada menjelip bisa djadi linjap atawa berobah maksoednja. Lebih tjilaka lagi, itoe pikiran jang diberdiriken dengen banjak soesah atas fondament jang begitoe boeroek, ada penoeh dengen tjatjat dan kakliroean jang tida bisa dibetoelin, kerna kapan orang menimbang peladjaran Khong Tjoe dengen mengandel pada boenjinja salinan jang kliroe, pasti sadja itoe pertimbangan poen toeroet menjasar djoega.