42
TJERITA ROMAN
Pada masa itoe, di Pasir Mas jang soenji, Tiong-gie poen lagi gadangin sang dewi Boelan jang sebagi tetampah mas tertaboer inten telah menempel di itoe langit biroe jang bersih sebagi selembar bloedroe aloes menoetoep djagad, lebar dan besarnja tida dapet dioekoer.
Keada’an di sitoe ada soenji dan tentrem. Tapi tida terlaloe soenji, sebab dari itoe roemah pondokan koeli-koeli jang tida djaoeh dari sitoe dan berada di bagian bawah, terdenger soeara ketjapi jang ditaboeh dengen aloes dan dengen lapat-lapat terdenger soeara njanjian jang merdoe.
Dalem keada'an begitoe, orang poenja perasa'an aloes dapet hidoep dan dapet meniinbang arti penghidoepan dengen laen katja-mata.
Tiong-gie merasa soeka dan tjotjok dengen itoe tempat jang soenji, dimana ia bisa hidoepken perasa’annja, dapetken ketentreman, mendeketin kepada Alam jang terbesar, mendapet taoe kebesarannja Alam, memoedja kekwasa'annja Toehan, tapi boeat lantas bentji pada. . . . manoesia dan penghidoepan.
Memandeng keindahan dan kebesarannja natuur timboelah Tiong-gie poenja perasa'an jang lebih aloes, menjiptaken brapa sairan boeat loeapken perasa’an hatinja:
