'HIDOEP'
41
„Dan bagimana kaoe pikir tentang itoe hal?”
„Ja, apa jang moesti dipikir lagi,’pa; Toehan tida perdjodoken itoe perdjodoan, apa maoe dikata. . . . . . . . itoe soedah kehendak Toehan. . . . . . . . Akoe djadi djanda sebelon kawin,” saoetnja Gwat-iem dengen tenang, kemoedian ia tinggalken ajahnja, masoek dalem kamarnja, boeka sang djendela dan memandeng itoe remboelan poernama jang moelai terbit dari sela-sela goenoeng.
Itoe gadis tarik itoe kaloeng dimana ada tertjantoem satoe salib, tempelken di batoek kepala, kemoedian tempelken di dadanja jang berombak, lantas tjioem itoe salib, kemoedian ia kloearken soeara grendengan jang tjoema bisa didenger oleh iapoenja koeping sendiri atawa oleh itoe. . . langit jang djaoeh dan ngelangoet: „Oh, Toehan jang Maha Asih, ampoenkenlah padanja. . . . . . . . Ia boekan poengkirin Kaoe poenja kebesaran, tapi tjoema sebab ia masih tertoetoep oleh iapoenja hawa nafsoe kemoeda'an. . . . . . . .”
Aer-mata jang bening kliatan mengembeng di kedoea matanja itoe gadis, tertodjo oleh sinar remboelan, kedoea mata itoe tertampak seperti dilapis oleh crystaal, bening dan menodjo balik itoe sinar.
Kesian! Ia djadi djanda sebelon menikah!
