13
Di terangnja kilat itoe Dantes dapat melihat di antara poelo Lemaire dan tandjoeng Croisell soewatoe praoe penangkap ikan, jang terampoel-ampoel oleh ombak-ombak besar dan mendatangi ka poelo Tiboulen.
Dantes menengok ka sana-sini aken tjari apa-apa boewat membri tanda pada orang-orang di praoe itoe, jang djikaloe praoe itoe tida dirobah toedjoeannja, tantoe nanti djadi binasa, lantaran terdam par pada karang; aken tetapi Dantes itoe tida bisa dapatken apa-apa di tampat itoe.
Pada waktoe ada kilat kombali, Dantes dapat lihat di praoe itoe ampat orang jang peloeki tiang dan saorang jang pegangi gagang kamoedi jang telah patah. Njatalah orang-orang itoe ada melihat djoega pada Dantes, kerna ia-orang poenja triak aken meminta toeloeng ada terdengar oleh Dantes.
Dengan terkoenjoeng-koenjoeng tali-tali lajarnja praoe itoe terpoetoes, dan sekalian lajarnja lantas linjap terbawa angin. Di itoe waktoe djoega Dantes dengar soewara triak jang mengantjoerken hati; komoedian ia lantas dapat lihat, di terangnja kilat, soewatoe praoe jang telah petjah dan orang-orang jang kalelap-lelap di ajer. Pada waktoe ada kombali kilat, samoewa itoe soedah tida kalihatan lagi. Lama djoega Dantes memandang pada laoet, sambil memasang koeping, tapi tiada djoega ia dapat lihat, tida djoega ia dapat dengar apa-apa, lain dari ajer laoet dan goemoeroehnja ombak-ombak.
