GANDJARAN JANG PANTES
75
kahormatan besar sekali kita telah dapetken. Mana kaoe poenja iboe dan ajah? Akoe ingin lantas bertemoe dengen marika boeat hatoerken trima kasi."
Samentara itoe Gwat Nio dan Liong Nio kaloear dan marika tjoema manggoet sadja dengen tjara kakoe sekali. Si Hok, jang toch marika kenalin, marika tida tanja. S:en Nio jang tida bisa doega, apa sebabnja itoe doea gadis bisa ambil sikep begitoe roepa, lantes berkata: „Apa kaoe tida kenalin engko Hok?"
„Kenalin djoega, tapi ia banjak berobah." kata Liong Nio.
Gwat Nio tida bilang apa-apa.
Roepa-roepanja itoe doea gadis poenja pengrasa'an bentji pada si Hok masi tetep ada. Memang banjak orang djikaloe berboeat satoe kesalahan, sering kali maoe salahken laen orang, tida maoe tjari taoe, apa brangkali diri sendiri ada lebih bersalah. Begitoelah djoega dengen Gwat Nio. Itoe gadis masi djoega merasa gegetoen, jang itoe malem djoestroe ia dipergokin oleh si Hok, Apakah brangkali ia poenja sikep itoe waktoe pada itoe lelaki moeda jang djadi ia poenja penganter tjoema- poera-poera sadja, dan ia poenja bertreak minta toeloengan poen tjoema satoe moeslihat belaka?
Tida lama kamoedian entjek dan entjim Tiong Bie poen soeda kaloear. Dengen tjara jang manis dan goembira itoe laki istri samboet kedatengannja si Hok bersama iboenja, dan marika sigra djoega dianter ka roeangan dalem, dan dipersilahken doedoek hadepin medja jang soeda dirias bagoes.
Tiong Bie laloeh panggil Sien Nio dan minta itoe gadis doedoek di seblah kiri dari ia poenja iboe jang oedoek deket semoeanja, sedeng iboenja Hok dan
