„Kenapa tida? Boeat akoe oewang ada perkara ketjil, kerna kita soeda poenja oewang. Kita tjoema poenja anak satoe, jaitoe Sïen Nio, dan kita ingin dapeiken mantoe jang baek. Kaoe ada poenja anak jang mempoenjai itoe sifat-sifat jang kita ingin ada dipoenjai oleh satoe lelaki moeda, kebaktian, radjin, otak terang dan bisa tahan melarat. Itoe semoea Hok soeda boektiken, ia memang poenja. Nah, biarlah moelai sekarang kita djadi besan!”
Tentoe sadja iboenja Hok djadi moefakat dan lantes hatoerken trima kasi pada njonja Tiong Bie jang itoe njonja hartawan soeda soeka angkat Hok djadi mantoenja.
Bogitoelah sedeng itoe doea orang moeda masi belon mengarti betoel apa adanja itoe pengrasa'an jang marika kandoeng boeat satoe sama laen, masing-masing poenja iboe soeda bisa tentoeken apa jang mengiket marika berdoea dan soeda poetoesken marika poenja peroentoengan.
Njonja Tiong Bie tinggalkan tetamoenja jang bakal djadi ia poenja besan sabentaran dan ketemoeken soeaminja, jang itoe waktoe masi repot, kerna maskipoen itoe waktoe soeda malem, masi sadja ada orang jang berlandja di tokonja. Dengen girang ia trima itoe kabar dari istrinja dan kamoedian hampirken iboe nja Hok dengen siapa ia bitjara bisik-bisik sambil tertawa.
Kira-kira djam sembilan makanan jang dipesen soeda dateng dan begitoelah Tiong Bie bersama istrinja laloeh oendang Hok dan iboenja boeat doedoek bersantap sama-sama. Tiong Bie doedoek di oedjoeng medja. Di seblah kanan dari ia ada doedoek ia poenja
istri dan kamoedian Sien Nio, sedeng di seblah kiri
