GANDJARAN JANG PANTES
11
mar pakerdja'an dan lantes brenti sekola. Djikaloe iboe moefakat, biarlah kita tinggal melarat begini lagi doea tahon. Apabila akoe soeda tamat beladjar dalem H. B. S., maskipoen pladjarankoe belon mateng betoel, tapi soeda loemajan djoega. Akoe poen rasaken pengidoepan di ini waktoe ada berat sekali, tapi apakah iboe pernah dapet denger akoe merasa koerang poeas dengen kita poenja nasib di ini waktoe? Pernahkah iboe mendenger akoe mengeloeh lantaran akoe moesti banting toelang siang dan malem goena tjari pengidoepan boeat akoe dan kaoe sendiri dan berbareng dengen itoe, djoega kedjer kapinteran? Tida, boekan? Nah, iboe, timbanglah dengen mateng, apa jang akoe moesti berboeat. Kaoe poenja kainginan akoe aken lantes toeroet dengen tida sangsi lagi."
Sang iboe memandang dengen penoeh rasa tjinta pada poetranja.
„Ja, hiok, djikaloe akoe inget, begimana kaoe poenja pengidoepan waktoe kaoe poenja ajah masi ada, akoe djadi merasa seperti djoega akoe poenja hati terdjepit dan aer mata hendak mengoetjoer seperti djoega ada jang peres. Tapi akoe poenja kasedihan itoe djadi berlaloeh, djikaloe akoe meliat kaoe poenja kagiatan, kaoe poenja kebaktian dan kaoe poenja sikep. Baeklah, anak, akoe nanti timbang lagi apa jang baroesan kita bitjaraken. Djikaloe tida terlaloe terpaksa, akoe poen maoe toeroet kaoe poenja kainginan."
Itoe orang moeda mendengerin bitjaranja sang iboe sambil toendoek dan kamoedian berpamitan.
Itoe waktoe ia poenja pakean ada laen sekali dari di waktoe ia baroe poelang dari sekola. Sekarang ia tjoema memake satoe badjoe djas dengen tjelana tidoer dan sama sekali tida memake sepatoe.
