10
TJERITA ROMAN
„Sabetoelnja akoe sendiri anggep kaoe terlaloe tjape, anak," kata ia „pagi kaoe sekola, tengahari kaoe poenja pladjaran moesti diperhatiken dan diwaktoe malem kaoe mentjari redjeki. Apakah tida baek kaoe brenti sadja sekola dan tjari pakerdja'an jang tentoe. Akoe menjesel sekali kita ada begini miskin, hingga tida bisa kasi kaoe sekola meloeloe dengen tida oesa tjape lagi di waktoe malem. Kita moesti pilih satoe antara doea, Hok, pladjaran atawa pengidoepan jang lebih baek."
Itoe djedjaka bersenjoem tempo ia deketin iboenja.
„Iboe, apakah iboe tida bisa tahan melarat? Apakah iboe soeda tida koeat memikoel kasengsara'an? Djikaloe memang itoe ada djadi iboe poenja kemaoean, akoe aken lantes brenti sekola dan dengen lantes djoega akoe bisa dapet pakerdja'an jang membri hasil anem atawa toedjoepoeloeh saboelan dan djikaloe akoe bekerdja pada negri, brangkali djoega akoe bisa dapet saratoes roepia. Dengen oewang sebagitoe, iboe, kita bisa mendapet pengidoepan jang lebih baek; kita aken bisa sewa roemah jang lebih pantes dari ini; kaoe tida oesa berpakean begitoe boeroek seperti sekarang dan akoe poen tentoe bisa goenaken sedikit oewang belandja. Tapi iboe, akoe poenja pladjaran tida tjoekoep, akoe djadi saorang jang kepalang tanggoeng dan akoe ingin sekali mempoenjai pladjaran jang sedikit tinggi, jang akoe bisa goenaken di kamoedian hari boeat membri hari-hari jang senang dan santousa pada iboe. Menoeroet akoe poenja pikiran, biarlah sekarang kita hidoep melarat, asal di kamoedian hari, djikaloe kaoe soeda toewa kaoe bisa hidoep dalem kasenangan jang tjoekoep. Tapi kombali akoe bilang, iboe, apabila memang djadi kaoe poenja kainginan jang pasti, besok djoega akoe nanti la-
