— 28 —
maoe bawa padanja saorang jang dapet loeka dan minta dibikin sedia satoe tempat dan apa jang perloe boeat boengkoes satoe loeka sekalian diminta djikaloe deket itoe tempat ada satoe dokter, boeat pergi panggil padanja, djoega dikasi taoe jang iaorang nanti dapet oewang tjapenja.
Toean roema makan jang liat itoe doea anak moeda poenja pakean perlente lantes berdjandji boeat toeroet apa jang diminta dan sasoedanja dapet kenjata’an, betoel orang toeroet iaorang poenja perminta’an, ia berdoea Jantes brangkat lagi menoedjoe ka Greney.
Iaorang djalan soeda kira kira satoe mijl djaoenja dan dari djaoe soeda keliatan genteng dari roema roema di itoe doesoen, itoe tatkala iaorang: dapet liat satoe orang dengen berpake pakean padri ada dateng toedjoean iaorang dengen toenggang satoe kalde. Djadi kabetoelan iaorang dapet dengen sigra apa jang ditjari.
Ini doea anak moeda hampirken itoe orang.
Keliatannja itoe padri oemoernja kira kira doeapoeloe tiga taon, tapi roepanja soeda rongsok, moekanja poetjet semoea koening, ramboetnia pendek dan matanja keliatannja sebagi tiada ada tjahjanja.
„Toean," kata Raoul dengen hormat, „apa kau ada satoe padri ?"
„Boeat apa kau tanja begitoe?" kata itoe orang dengen sanget koerang adjar.
„Boeat dapet taoe itoe perkara," kata graaf de Guiche dengen angkoe.
Itoe orang tjamboek kaldenja dan djalan teroes.
De Guiche baliken koeda, boeroe dan tjegat djalananja.
