— 272 —
diteeken, ia pergi di djendela dan kasi liat itoe kertas jang ada di tangannja.
„Ini dia itoe soerat prenta!“ ia bertreak.
Itoe kabar soeda bikin sekalian orang pembrontakan jang ada di depan astana djadi sanget girang hatinja, ia orang lantes bertreak : „Leve Broussel !“ „Leve coadjutor!“
„Leve Sri Ratoe!“ coadjutor treaken.
Bebrapa orang samboet toeroet bertreak, tapi tiada sebrapa banjaknja orang jang satoedjoe dengen treakannja coadjutor.
Brangkali djoega coadjutor sengadja berboeat begitoe, soepaja Ratoe Anna bisa dapet kenjata’an jang ia poenja kekwasa’an tiada sebrapa besar lagi.
„Sekarang kau soeda dapet apa jang kau ingin, kau boleh brangkat toean coadjutor.“
„Apabila Sri Ratoe perloe pada akoe,“ kata coadjutor dengen manggoet renda, „Sri Baginda taoe jang akoe sedia boeat toeroet prenta.“
Ratoe Anna kasi tanda dengen kepalanja dan coadjutor djalan kaloear.
„O! padri terkoetoek!“ Ratoe Anna treaken apabila coadjutor soeda kaloear dari pintoe jang baroe sadja ditoetoep lagi ; „apa jang kau berboeat ini hari pada akoe, nanti kau dapet kembali dengen lebi pantes!“
Mazarin maoe hampirken padanja.
„Djangan ganggoe akoe, kau boekan satoe lelaki!“ kata Ratoe Anna dengen djalan pergi dari itoe roeangan.
„Kau jang boekan saorang prempoean!“ kata Mazarin dengen menggrendeng.
Sasoedanja berpikir bebrapa lamanja Mezarin dapet inget jang d’Artagnan dan Porthos ada dalem kamar jang berdamping dengen itoe
