— 273 —
roeangan, hingga ini doea orang telah denger apa jang baroe dibitjaraken. Dengen moeka merengoet ia hampirken itoe kamar dan angkat gordijnnja. Tapi dalem itoe kamar tiada ada keliatan satoe orang.
Koetika denger Ratoe Anna kaloearken itoe perkata’an jang paling blakang, d’Artagnan lantes tarik tangan sobatnja dan pergi di roeangan sebla loear.
Mazarin djalan teroes dan dapetken ini doea orang lagi djalan djalan moendar mandir.
„Kenapa kau pergi di itoe kamar, toean D’artagnan?“ Kardinaal tanja.
„Kerna Sri Ratoe telah prenta sekalian orang boeat kaloear dan akoe kira itoe prenta dikasi pada kita djoega,“ kata D’Artagnan.
„Djadi kau ada di sini sedari ....“
„Soeda kira kira saprapat djem lamanja,“ kata d’Artagnan dengen awasin pada Porthos jang sekalian ia kasi tanda boeat djangan tjampoer bitjara.
Mazarin dapet liat d’Artagnan kasi tanda pada sobatnja, maka Mazarin doega jang d’Artagnan telah dapet denger itoe sekalian perkara jang dibitjaraken baroesan, tapi Mazarin indaken d’Artagnan jang bisa toetoep resia dengen berdjoesta.
„Toean d’Artagnan, kau betoel ada itoe orang jang akoe perloe, kau dan kau poenja sobat boleh harep akoe bales kau poenja pertoeloengan.”
Kamoedian dengen tersenjoem manis ia kasi tabe pada ini doea sobat. Mazarin masoek dalem kantoornja dengen senang pikiran; kerna itoe soeara riboet di loear astana soeda lantes djadi padem koetika coadjutor kaloear dari astana.
