— 234 —
― „Saänteronja?"
― „Ja! sekarang biarlah kaoe pepat kombali itoe lobang ijang kaoe soedah gali; kemoedian djangan kaoe berboewat apa-apa, hanja toenggoelah kabar dari padakoe."
― „Tapi siapatah kaoe ini?"
― „Akoe ini si nomor 27."
― „Apa kaoe tida pertjaja padakoe, maka kaoe tida maoe bilang namamoe sendiri?"
Si nomor 27 itoe tida menjahoet, hanja tertawa.
„Akoe ini seorang Kristen ijang baik," kata poela Edmond Dantes: „akoe bersoempah, ijang akoe lebih soeka diboenoeh mati, dari pada tjeritaken adanja ini lobang pada pendjaga; aken tetapi, ja Allah, djanganlah kaoe singkirken dirimoe, soepaja sedikitnja poen akoe boleh denger kaoe poenja soewara; djika kaoe tida maoe tjampoer padakoe ini..... akoe bersɔempah, akoe nanti bentoerken kapalakoe sendiri pada tembok, biarlah akoe djadi mati dengen lantaran kaoe."
― „Brapatah oemoermoe? Toeroet boenjinja soewaramoe, kaoe ini seorang lelaki ijang masih moeda."
― „Akoe soedah tida taoe, brapa oemoerkoe sendiri ; kerna akoe tida menghitoeng brapa lama akoe soedah tertoetoep disini. Akoe taoe sadja, ijang tempo akoe ditangkep pada 28 Februari 1815, akoe ada beroemoer 19 tahon."
― „Kaloe begitoe, kaoe belon beroemoer 26 tahon, seorang ijang masih moeda seperti kaoe, belon berhati boesoek."
― „Tida sekali! dan akoe brani soempah. Apa ijang akoe soedah berkata padamoe dan sekarang akoe oelangken poela,
