— 235 —
bahoewa akoe lebih soeka dibelah-belah, dari pada menjilakai kaoe."
― „Baiklah djoega kaoe berkata begitoe, dan soedah meminta-minta padakoe, kerna akoe telah dapet niatan lain dan soeda maoe berlaloe dari padamoe. Tapi oemoermoe ada senangken hatikoe; akoe nanti dateng padamoe, biarlah kaoe bernanti."
― „Kapantah kaoe nanti dateng?"
― „Akoe misti menoenggoe tempo ijang baik; akoe nanti membri tanda padamoe."
― „Tapi kaoe tida nanti tinggalken akoe, hingga akoe djadi sendirian sadja, apa betoel kaoe maoe dateng padakoe? kaloe bole idzinken akoe dateng padamoe. Kita-orang nanti minggat bersama-sama; kaloe tida bisa minggat, kita-orang nanti beromong-omong: akoe nanti mengomong dari hal orang-orang ijang akoe tjinta, dan kaoe nanti mengomong dari hal orang-orang ijang kaoe tjinta. Kaoe poen tentoe ada poenja djoega orang ijang tertjinta olehmoe."
― „Akoe ada sendirian sadja di doenia ini."
― „Kaloe begitoe, kaoe nanti tjintaï akoe. Kaloe kaoe masih moeda, akoe nanti djadi sobatmoe; kaloe kaoe soedah toewa, akoe nanti djadi anakmoe. Akoe ada poenja bapa, ijang sekarang ini brangkali djoega soedah beroemoer toedjoeh poeloeh tahon, saändenja ija masih hidoep; melinken dialah akoe tjintaï dan lagi satoe nona nama Mercedes. Bapakoe tentoe sekali tida nanti meloepai akoe; tapi nona Mercedes melinken Allah sadja ijang taoe apa dia masih inget padakoe atawa tida. Akoe nanti tjinta padamoe, sebegimana bapakoe sendiri."
