— 103 —
maoe pantjing ia dateng ka sini, dimana iaorang aken bisa bertempoer dengen iaioeasa dan tida ada orang jang mengganggoe, Tapi lantaran ia mengandel sama iapoenja ilmoe kapandean, biar poen ia taoe bahoea itoe hiapkek ada mempoenjai ilmoe kapandean jang tinggi, toch ia tida djadi keder atawa poen djeri.
„Nah, sekarang kita soeda sampe di tempat soenji, dimana kita bisa mengaloearken masing-masing poenja ilmoe kapandean dengen tida oesa kwatir ada orang jang mengganggoe. Marilah kita lantes boleh moelai.”
Tie Tjong Siansoe merandek doeloe sabentaran boeat membikin beres iapoenja napas, dan merasa heran sekali koetika meliat Boe Beng Hiap Kek dan itoe orang prampoean jang ia seboet istrinja berdiri dengen adem dan aman, sedikit poen tida kentara napasnja memboeroe lantaran ketjapean lari. Tapi dengen lekas djoega iapoenja napas soeda bisa mendjadi rata kombali, maka ia lantas berkata: „He, Boe Beng Hiap Kek, kaoe djangan maoe mendjagoin dan begitoe menista pada orang dari tjabang Siao Lim Sie, sekarang akoelah jang aken membelaken benderanja itoe tjabang jang kaoe pandang enteng.”
„Akoe pandang enteng pada tjabang Siao Lim Sie!?” berseroeh Boe Beng Hiap Kek, „itoelah satoe kadjoestahan besar! Akoe sama tjabang Siao Lim Sie boekan sadja tida bermoesoeh, tapi sabaliknja bersobat. Akoe poenja soeheng ada mendjadi sobatnja Hian Tjong Siansoe. Siapatah jang bilang akoe pandang enteng pada orang-orang dari tjabang Siao Lim Sie?”
„Apa Tjeng Sian boekannja orang dari tjabang Siao Lim Sie, sebab iapoenja goeroe toch ada akoe poenja soeheng, Hian Tjong Siansoe!"
