-6-
hadepannja itoe nikoh, mendjoera delapan kali dan membahasaken goeroe.
Ternjata ini nikoh bernama Tjeng In Nikoh. berasal dari Biauw Thong Am di dalem bilangan Holam, la ada achli silat dari tjabang Siaolim, jang mempoenjai ilmoe kapandean. laykang dan noeikang jang sangat tinggi. Sedeng Yo Kok Hiong poenja ilmoe kapandean silat tjoema ilmoe silat jang bisa dipake dalem medan paperangan sadja, dalem hal ilmoe kapandean lompat tinggi, ilmoe mtngentengken badan dan ilmoe lari dengen tjepet, sama sekali tida paham, hingga Lian Eng, Lioe Eng, Lee Na dan Lee Tjoe jang mendjadi moeridnja, soeda tentoe sadja, seperti marika poenja goeroe, djoega tida paham itoe matjem ilmoe.
Inilah sebabnja Tjeng In Nikoh soeda bilang sajang, jang itoe ampat gadis tida bisa goenaken marika poenja ilmoe kapandean, kerna sebagi orang-orang prampoewan, marika tida aken bisa madjoe ka medan paperangan; sedeng kaloe maoe mendjadi hiapkek teroetama moesti pande ilmoe lompat tinggi mengentengken badan dan lari tjepet.
Moelai dari itoe waktoe Tjeng in Nikoh teroes tinggal di roemahnja Yo Kok Hiong mengadjar pada itoe ampat gadis dalem itoe semoewa ilmoe jang telah diseboetken di atas tadi. Tiga boelan kamoedian itoe orang pertapahan prampoewan berlaioe ka laen tempat, satoe boelan kamoedian ia soeda balik kombali dan mengadjar lagi pada moerid-moeridnja itoe, doewa boelan kamoedian kombali ia berlaioe ka laen tempat, begitoe sateroesnja. Tapi pada saban kali la maoe brangkat pergi, selamanja ia adjarin moerid-moeridnja bebrapa matjem ilmoe kapandean boewat dijakinken, dan ditilik serta dibetoelken — kaloe ada jang salah — pada waktoe ia balik kombali.
