-46
„Oppas! mana Tjhio Tjoe Boen, apa soeda dipanggil dateng ke sini," menanja ia pada sala satoe oppasnja berdekatan. „Kwee Sam poenja loeka boleh diobatin dan dibebat. Baroesan lantaran ia soedah kasi katerangan jang djoesta, maka soeda membikin mereka pada itoe kawanan hiapkek. Sabentar akoe maoe bikin lagi pertanjahan, djika iapoenja loeka soeda dibebat dengen rapih."
V.
Tersoeroeng dengen pengrasahan takoet, maoe poen Loei Djip Lay, atawa poen Kwee Sam dan kawan-kawannja, semoewa tida brani „maen kajoe" lagi. Itoe tikoan bikin papreksahan dengen menoeroet atoeran jang sabagimana moestinja, sedeng itoe anam orang-orangnja Tjhio Tjoe Boen mengasi katerangan dengen teroes terang: semoewa perboeatannja iaorang poenja madjikan dibeber dengen djelas, dan dengen tjara bagimana Giok Nio soeda dapatken kamatiannja, tjara bagimana maitnja dikoeboer.
Dengen ini semoewa kasaksian, maoe apa tida Tjhio Tjoe Boen moesti ditangkap dan dipreksa; tapi ia teroes menjangkal dan bilang boedjang boedjangnja soeda memfitenah padanja lantaran sakit hati. Loei Djip Lay merasa tida sanggoep preksa ini perkara, laloe dorong itoe persakitan dan saksi saksinja pada l'jian Khong Hong, tihoe dari Kongijioe, Tjian Khong Hong lantaran Tjhio Tjoe Boen ada iparnja Phoa Boe Liang, saorang berpangkat liat-tay dari itoe kota. sedang Tan Kian Wie, Tjongtok dari kwitang dan Kwisay, ada mendjadi Phoa Boe Liang poenja sobat baek, maka ia tida brani lantas preksa itoe perkara, hanja dengen salekasnja ia soeroe oppasnja sediaken djoli dan pergi mengoendjoengin kantoornja liat-tay.
