-45-
Achirnja satoe djoeroe toelis jang lebih tabah, menjamperin ka itoe medja pengadilan, djoempoet itoe boentelan kertas, jang ternjata di sabelah dalemnja ada terdapat satoe batoe hoei-hong-sek; sedang itoe kertas ada terdapat toelisannja. Loei Djip Lay achir-achir ilang djoega pengrasahan kagetnja, dan sodorken sabelah tangannja minta itoe soerat dipasrahken padanja. Itoe djoeroe-toelis laloe trimaken itoe soerat pada chefnja dengen lakoe jang hormat, kamoedian lantas moendoer dan berdoedoek lagi di iapoenja tempat sendiri.
Dengen tangan jang masi bergoemeteran Loei Djip Lay beber itoe kertas dan batja boenjinja seperti brikoet:
„Loei Djip Lay. Ini ada kita poenja pringetan jang paling achir. Baroesan itoe hoei-to dengen sengadja akoe bikin menantjap di atasnja kaoe poenja topi kabesaran. Apa kaoe soeka itoe sendjata menantjap di kaoe poenja oeloe ati? Liat tjonto si Kwee Sam. Ia soeda tida toeroet kita poenja pesenan; maka akoe kasi ia adjaran jang sedikit keras, sebab kita tida maoe mengorbanken djiwa kaloe belon perloe. Tapi, kaloe kaoe, Kwee Sam, dan jang laen-laennja tidi maoe menoeroetin sabagimana jang kita soeda pesen, terpaksa kita moesti mengalirken darah dan bikin melajang kaoe orang sekalian poenja djiwa.
„Yio-shia Hiap Kek."
Loei Djip Lay poenja tangan djadi samingkin bergoemeteran, giginja poen bertjatroean satoe dengen laen. Lima, djoega ia berpikir, achirnja soeda ambil satoe poetoesan pasti.
