-47-
Sabetoelnja Plioa Boe Liang memang soeda taoe perkaranja iapoenja engkoe-adenja iapoenja bini-tapi lantaran anggap tikoan dan tihoe tentoe aken melindoengin, maka ia sama sekali tida maoe iboekin, sekarang mendadak Tjian tihoe dateng kasi taoe bahoewa itoe perkara djadi sangat heibat, kerna ada bebrapa hiapkek jang tjampoer tangan dari blakang lajar. la dikasi taoe djoega tjara bagimana Kwee Sam dan laen-laennja poenja katerangan, jang semoewanja ada memberatken sekali pada Tjhio Tjoe Boen.
Boewat bebrapa sa'at lamanja Phoa Boe Liang tinggal bengong, kerna ia sendiri tida taoe dengen tjara bagimana moesti menoeloengin pada iapoenja ipar itoe. Mendadak ia dapat inget pada Tan Kian Wie tjongtok jang mendjadi iapoenja sobat baek, hingga iapoenja hati jang berkoewatir djadi lega kombali.
„Akoe harap sadja koeihoe soeka tahan doeloe ini perkara," kata ia, „sebab akoe maoe pergi mengadep pada tayswee dan minta iapoenja pertimbangan. Saorang jang berderadjat tinggi sabagi akoe poenja ipar itoe, biar poen ia betoel bersalah membikin tiwas satoe djiwanja rahajat ketjil, akoe rasa tida sampe mendapat hoekoeman berat. Tapi, biar begimana djoega, akoe tida loepaken meminta koeihoe poenja tanaga bantoean.
„Oh, boewat kata membantoe pada taydjin poenja familie, tentoe sekali akoe soeka sekali, asai sadja ada djalannja," saoet Tjian Khong Hong. „Tjoema dalam ini oeroesan lantaran ada itoe kawanan hiapkek jang berdiri di blakangannja pendakwa, akoe rasa lebih baek taydjin bertindak lebih hati-hati sedikit. Sebab apa jang soeda terdjadi di dalam kantoornja Loei Tikoan, itoelah ada satoe tjonto jang tida boleh tida diperhatikan."
