-40-
segala hal jang soeda terdjadi, dan kaloe kita brani membantah dan tida toeroet itoe pesenan, dalem sembarangan waktoe kita poenja djiwa aken dibinasaken. Oleh kerna itoe djoega, toaloya, kita djoestroe merasa sanget bingoeng atas apa jang kita moesti berboewat. Sekarang kabetoelan toaloya dateng ka sini, maka akoe sanget memoehoen soepaja toaloya kasi prentah apa jang kita moesti lakoeken."
Tjhio Tjoe Boen keroetken halisnja, tapi sabisanja ia menahan kagoesarannja.
„Kaoe orang pikir maoe berboewat bagimana ?" menanja ia dengen soewara manis dibikin-bikin.
„Saoepamanja akoe sengadja langgar pesenannja itoe ampat hiapkek," kata Kwee Sam, „apa toalaya bisa lindoengin akoe poenja djiwa dari marika poenja tangan jang mengantjam ?'
„Itoelah ada mendjadi akoe poenja kawadjiban boewat melindoengin pada akoe poenja orang-orang jang setia," kata Tjhio Tjoe Boen, „Apa kaoe merasa sangsi tentang itoe ?"
„Tapi, akoe moehoen toalaya poenja moerah hati boewat memberi ampoen atas akoe poenja kamelitan," kata Kwee Sam. „Pertama, apa kaloe akoe moengkir, akoe bisa dimerdikaken? 'dan kaloe akoe poelang ka roemah, tjara bagimana akoe aken mendapet perlindoengan? Kadoewa, kaloe akoe ditahan di dalem pendjara, apa akoe bisa terlepas dari serangannja itoe ampat hiapkek ? Akoe terpaksa moesti menanjaken ini semoewa hal dengen melit, sebab akoe koewatir saban waktoe djiwakoe bisi dibikin melajang oleh itoe ampat hiapkek jang sangat lihay"
„Akoe tanggaeng jang kaoe aken dimerdikaken, kaloe sadja kaoe tida mengasi katerangan jang memberatken padakoe," saoet Tjhio Tjoe Boen. „Sedang
