-39-
„Kwee Sam", kata Tjhio Tjoe Boen achir-achir, „apa jang kaoe soeda alamken koetika pergi ka Soe-tjoe lim ?"
„Toaloya, akoe harep soeka memberi kaampoenan pada kita beranem", saoet Kwee Sam, „boekannja kita tida maoe bekerdja dengen soenggoe-soenggoe, tapi fihak moesoeh ada djaoe lebih koewat, hingga terpaksa kita moeti menjerah dan bertoendoek. Koetika toaloya bersama laen-laen kawan sadjabatkoe dateng ka itoe rimba, kita boekannja tida taoe, tapi tida brani bersoewara, kerna diantjam aken diboenoeh mati djika kita brani berboewat begitoe, malah itoe waktoe kita poenja soempelan di moeloet masi sanget keras dan taro kata maoe bersoewara poen tida bisa.
„Koetika kita sampe di dalem itoe rimba, dengen lantas kita pergi ka bawahnja itoe poehoen tjemara besar, di mana kita moelai menggali itoe tanah di dalem mana maitnja Giok Nio ada terkoeboer, tapi baroe sadja kita angkat itoe mait dan diboengkoes lagi sama satoe lembar tiker jang kita bawa, lantas lompat kaloewar ampat orang jang moekanja semoewa item dan memake koemis djenggot dan tjambang, dalem sedikit sa'at kemoedian kita dibikin seperti patoeng-patoeng jang berdiri dengen tida bisa berkoetik barang sedikit. Boleh djadi itoe ampat hiapkek aneh telah goenaken ilmoe tiam hwee, sebab kita orang tjoema ditoesoek oleh marika dengen djeridji, lantas sadja kita tida bisa bergerak lagi.
„Kita poenja pendengeran begitae poen lida, semoewanja masi bisa bekerdja dengen baek, tapi kaki tangan ada begitoe kakoe, hingga tida bisa berkoetik barang sedikit. Sala satoe dari itoe hiapkek pesen soepaja kaloe kita soeda dihadepken pada pembesar negri, moesti bitjara dengen sasoenggoenja tentang
