-34-
„He, ada oeroesan apa bangoenin padakoe, begini pagi'?menanja ia koetika memboeka pintoe kamarnja dan meliat satoe boedak prampoewan berdiri di hadepannja dengen paras moeka kaget.
„Di loewar ada terdapat satoe mait orang prampoewan jang soeda boesoek," saoet itoe boedak prampoewan, „dan menoeroet doegahannja bebrapa oppas, katanja boleh djadi ada maitnja Giok Nio jang dikoeboer di Soe........."
Itoe boedak prampoewan tida landjoetken bitjaranja sebab itoe tikoan delikin matanja.
„Ja, akoe soeda mengarti," kata ia dengen soewara menjentak „djangan banjak bitjara, hanja lekas pergi sediaken aer angat boewat tjoetji moeka.
Tjhioe Kiok, itoe boedak prampoewan, lantas berlaloe boewat melakoeken prentahnja iapoenja madjikan.
IV.
Baroe sadja itoe tikoan abis menoekar pakean dan doedoek makan pagi, satoe oppas masoek mengasi taoe bahoewa kepala kampoeng di Sip-lie toen ada dateng membawa anem orang jang dikatemoeken teringkoes di atas poehoen-poehoen dalem oetan Soetjoe-lim.
Ini tikoan dari Hwan-gie asalnja ada satoe soedagar garem di bilangan Yang tjioe, dengen pengaroehnja oewang ia soeda bisa dapet beli itoe pangkat tikoan di Hwan-gie, district kepala dari afdeeling Kongtjioe. lapoenja nama Loei Djip Lay; lantaran ia ada saorang dagang dan dapetken pangkatnja dengen oewang, maka pandang iapoenja pakerdjahan poen sebagi satoe matjem perdagangan, kaloe soeda mengaloewarken modal soeda tentoe sadja ia moesti tarik poelang itoe modal bersama rentenja djoega. Maka dalem iapoenja
