-33-
itoelah tida heran, sebab ia baroe sadja bergadang dan bakerdja dengen tjape. Kira djam sapoeloeh siang, pendoedoek dalem kota gemper membitjaraken apa jang semalem telah terdjadi di Sip lie toen dan dalem kantoornja tikoan dari district Hwan-gie, soeda tentoe sadja prihal maitnja Giok Nio jang dikatemoeken di depan kantoornja tikoan terseboet, teroetama menarik orang banjak poenja perhatian.
Blakangan sala satoe pendoedoek jang berdekatan sama Soe tjoe lim, koetika meliwatin itoe rimba denger soewara rintihan dari atas poehoen, dan achirnja dikatemoeken anam orang jang semoewanja terikat di atas poehoen-poehoen di sitoe, dan koetika hal ini dikasi taoe pada kapala kampoeng Sip lie-toen, ternjata itoe anam orang semoewanja ada orang-orangnja Tjhio Tjoe Boen, dan di antaranja ada terdapat mandoor Kwee Sam, Tjhio Hok dan Tjhio Eng; tapi iaorang tida taoe mengasi katerangen apa sebabnja iaorang terikat di atas itoe poehoen-poehoen. Tjoema tida djaoe dari sitoe orang katemoeken satoe lobang jang seperti bekas koeboerannja Giok Nio, dan sedikit banjak itoe anam orang tentoe ada tersangKoet sama itoe oeroesan.
Sabegitoe djaoe itoe kabaran jang menggemparkan diantara pendoedoek.
Tatkala tikoan dari district Hwan gie jang baroe sadja bisa tidoer poeles sabentaran, lantaran itoe pengalaman pada itoe maiem jang begitoe mengedjoetken dan menakoetin, soeda membikin ia tida bisa tidoer sampe ampir pagi; koenjoeng-koenjoeng ia dibangoenin oleh satoe soewara ketokan pintoe jang sanget keras, hingga ia djadi kalodjotan bangoen sembari lontjat toeroen dari pembaringannja.
