-32-
Itoe tikoan djadi bergidik dan seantero boeloe badannja seperti berdiri koetika ia inget tjara begi mana oedjoeng goloknja itoe hiapkek ditoedjoeken pada iapoenja dada. Satoe maleman itoe ia tida bisa tidoer lagi dengen senang, sebab saban-saban djadi mendoesin sama iapoenja impian-impian jang menakoetin.
Tatkala Lian Eng menjoesoel ka Soe-tjoe-lim di tengah perdjalanan ia bertemoe sama ampat kawannja jang soeda balik kombali dengen menggotong satoe mait jang soeda berbaoe boesoek dalem satoe goeloengan tikar jang penoeh tanah dan loempoer. Oleh kerna itoe waktoe hawa oedara masi dingin, maka itoe mait belon mendjadi roesak, sekali poen soeda dikoeboer ampat hari lamanja. laorang menoedjoe ka kantoornja tikoan dari Hwan-gie dan lemparken itoe mait di depan pintoenja kantoor terseboet. Oleh kerna itoe waktoe soedi ampir djam ampat pagi, dengen terboeroe-boeroe itoe lima orang menoedjoe ka roemahnja Liauw A Sam, dan Ong Giok Kay kasi taoe dengen ringkes apa jang itoe orang moesti berboewat pada sabentar siang.
„Tatkala iaorang sampe di roemah soeda ampir djam ampat satengah, tapi beroentoeng belon ada orang jang bangoen, hingga tida satoe manoesia jang taoe apa jang marika soeda berboewat. Dengen tjepat itoe ampat gadis masoek ka dalem marika poenja kamar, toekar pakean dan masoek tidoer, begitoe poen Ong Giok Kay.
Kira djam toedjoe pagi, dengen tersipoe sipoe itoe ampat gadis bangoen dan menjoetji moeka, tapi Giok Kay dasaran masi anak-anak masi tidoer poeles.
