-31-
Giok Nio dikoeboer di dalem Soe-tjoe lim, di bawahnja satoe poehoen tjemara besar. Besok kaoe moesti bawa orang boeat menggali itoe mait dan tangkap pada Tjhio Tjoe Boen, kompes sampe ia mengakoe kadosahannja. Kaloe sadja kaoe brani melanggar akoe poenja pesenan ini, besok malem akoe dateng lagi boewat ambil kaoe poenja kepala."
Satelah berkata begitoe, Lian Eng lantas lontjat kaloewar dari itoe kamar dengen memake djalan dari itoe djendela, dari mana lebih doeloe ia telah masoek.
Itoe tikoan dari Hwan-gie tinggal kamekmek sampe bebrapa lamanja, tida bisa bergerak dan djoega tida bisa bersoewara. Achir-achir ia bisa djoega mengaloewarken satoe soewara keras boewat memanggil boedjang-boedjangnja. Sedikit sa'at berselang dalem itoe kantoor tikoan lantas terdjadi kariboetan besar, bebrapa banjak oppas dengen mata masi sepat dateng memboeroe dengen membawa roepa-roepa sendjata dan obor-obor, tapi biar poen ditjari di segala ploksok, toch itoe tetamoe malem tida bisa dikatemoeken.
Biakangan itoe tikoan dapat liat itoe soerat jang terpanggang sama satoe badi-badi di atas medja, soerat mana boenjinja ada seperti berikoet:
„Disampeken kepada tikoan dari district Hwan-gie. Giok Nio, istrinja Liauw A Sani telah binasa dengen setjara penasaran di dalem roemahnja Tjhio Tjoe Boen; tapi kaoe dengen setjara sanget tida adil soeda berpihak pada itoe pendjahat dan maoe lindoengin padanja. Awas, kita selamanja menilik kaoe poenja gerakan, kaloe sadja kaoe masi tida maoe djalanken kaoe poenja kewadjiban dengen setjara adil, dalem segala waktoe kita nanti ambil kaoe poenja kepala.
„Yio-shia Hiap Kek."
