-29-
soewaminja djangan berboewat djahat; tapi Tjhio Tjoe Boen roepanja ada saorang djahat jang soeda tida bisa diperbaekin lagi, hingga sang istri selaloe berdoeka sadja. Berbareng dengen itoe, bisa didapatken kepastian bahoewa maitnja Giok Nio betoel dikoeboer di Soe tjoe lim, Tjoema kita moesti djaga djangan sampe di pindahken lagi ka laen tempat, kaloe Tjhio Tjoe Boen soeda mendapat taoe apa jang kita telah lakoeken."
„Sedang akoe dapatken katerangan dari pembitjarahannja Tjhio Eng sama satoe boedak prampoewan bernama Tjhioe Kiok jang mendjadi kendaknja," kata Lee Tjoe, „bahoewa tjhio Tjoe Boen ada mendjadi iparnja Liat tay Phoa Boe Liang kerna ipoenja entji ada mendjadi istrinja itoe liat tay; sedang Phoa Boe Liang ada mendjadi moeridnja Tan Kian Wie, tjongtok dari ini provincie. Dengen meliat itoe semoewa, tidalah haran kaloe Tjhio Tjoe Boen soeda brani berlakoe begitoe sawenang-wenang, kerna ada mempoenjai senderan jang berpengaroeh besar."
„Sekarang kita moesti bakerdja ka doewa djoeroesan,' kata Lian Eng, „akoe sendiri aken pergi ka kantoornja tikoan dari district Hwan-gie, sedang Lodji, Lo-sam, Lo soe dan Lo-ngo, semoewa moesti pergi ka Soe-tjoe-lim boewat intip apa Tjhio Tjoe Boen ada bikin pergerakan apa-apa dalem itoe hal jang berhoeboeng sama maitnja Giok Nio atawa tida; kaloe ada, boleh lantas kasi labrakan pada marika itoe dan rampas itoe mait, kamoedian taro di depan kantoornja tikoan dari Hwan-gie, dan satjepatnja pergi kasi kabar pada Liauw A Sam soepaja ia mendesak, pada tikoan aken preksa ini perkara."
