-27-
Begitoeiah itoe doewa orang lantas dibawa masoek lagi ka dalem pekarangan roemahnja Thio Tjoe Boen dan ditaro di bawanja satoe lataran jang bisa kaliatan oleh toekang ronda malem.
Tida antara lama kamoedian itoe ampat gadis dan satoe djedjaka soeda berlaloe djaoe dari itoe roemah, di mana iaorang baroe melakoeken pakerdjahannja.
„Lo dji, sekarang kaoe boleh tjoba toetoerken apa jang kaoe soeda dapatken dari kaoe poenja penjelidikan," kata Lian Eng pada ade prampoeannja.
„Baroesan koetika akoe pergi ka sabelah blakangnja itoe roemah, dengen satjara kabetoelan sekali akoe katemoeken kamar tidoernja Tjhio Tjoe Boen," manerangken Lioe Eng; „tapi bermoela poen akoe tida taoe kaloe itoe ada kamarnja Tjhio Tjoe Boen. Koetika baroe sadja akoe pasang koeping dan mengintip di selagan djendela, dengen lantas akoe ada denger soewaranja saorang prampoean jang mengalah napas, kamoedian kadengeran ia berkata: „Kaoe ini sasoenggoenja ada terlaloe bermata krandjang, boekannja akoe tjemboeroean, sebab kaloe kaoe maoe ambil laen prampoean sama sekali akoe tida maoe menghalangin, tapi djanganlah ambil prampoean jang mempoenjai soewami, sebab bisa menerbitken kaonaran sabagimana djoega sekarang."
„Ach. kaoe orang prampoewan tjoema moeloet sadja bilang tida tjemboeroean, tapi dalem hati kaoe pikir laen matjem. Perkara itoe istrinja penggawe toko hasil boemi, sabetoelnja akoe poen ada niatan boewat lepasken kombali padanja, kaloe sadja ia tida begitoe kaboeroe napsoe bentoerken kapalanja sampe petjah hingga mati. Tapi biar poen ia soeda mati dan emanja madjoeken dakwahan dengen terbantoe oleh madjikannja, toch akoe tida oesa merasa koewatir
