-20-
bahaja jang bagimana besarnja, toch kita aken teroes bakerdja dengen penoeh kagoembirahan dan katabahan."
„Entji Lian poenja omongan ada benar sekali," kata Lee Tjoe, „hingga akoe poenja kesangsian djadi teroesir pergi sama sekaii, dan sekarang akoe soeda ambil poetoésan pasti boeat toeroet ambil bagian dalem ini pakerdjahan."
„Bagoes!" berseroeh Lioe Eng, „akoe poen soeda mendoega lebih doeloe bahoewa kaoe poenja kasangsian tjoema boewat samentara waktoe sadja. Pada sasoedanja kita mendjadi satoedjoe satoe dengen laen, apa jang kita haroes pertama kali berboewat?"
„Besok kita boleh soeroean ade Giok Kay pergi ka Sip-lie-toen boewat mentjari taoe di mana letaknja Tjhio Tjoe Boen poenja roemah dan bagimana keadahannja," kata Lian Eng. „Akoe taoe ia ada satoe pamoeda jang menjinta keadilan dan bentji sama segala kadjahatan, soeda tentoe sadja ia aken berada di kita poenja fihak dan membantoe dengen sapenoehnja tenaga. Tjoema perloe dipesen soepaja ia tida bitjaraken ini oeroesan tida perdoeli pada siapa djoega. Ini hal poen akoe bisa pastiken ia aken bisa toetoep moeloet dengen rapat.
Sasoedanja itoe ampat gadis ambil poetoesan tetap, laloe iaorang masoek tidoer dan baroe bangoen pada waktoe langit moelai terang di hari jang berikoetnja.
111.
Lee Na koetika bertemoe sama iapoenja ade lelaki, laloe diadjak bitjara di satoe podjokan dari itoe lataran roempoet di mana biasanja iaorang soeka mejakinken ilmoe silat. Giok Kay mendengerin entjinja poenja omongan dengen saban-saban manggoetken kapalanja, menjataken jang ia satoedjoe atas apa jang dibitjaraken.
