-21-
Kamoedian iaorang mejakinken ilmoe silat sabagimana biasanja. Pada waktoe sasoedanja orang bersantap tengahari. Giok Kay bilang pada Kok Hiong bahoea ia ada katinggalan barang jang perioe di roemahnja, dan minta permisie poelang doeloe boewat ambil itoe.
Tapi Giok Kay boekannja poelang ka roemahnja, hanja menanjaken katerangan pada orang di djalanan, kaloe maoe pergi ka Sip-lie-toen moesti ambil djalan jang mana. Dengen tjepat GioK Kay soeda bisa sampe di tempat jang ditoedjoe, dan dengen tida terlaloe soesa ia soeda bisa tjari roemahnja Tjhio Tjoe Boen, jang memang terkenal dalem itoe kampoeng, terpetama dari sebab ia ada mempoenjai litel boe khi djin.
Ternjata roemahnja Tjhio Tjoe Boen ada besar dan loewas, sama sekali dan ada mempoenjai lima lapisan dengen lataran lataran jang mamisaken satoe dengen laen, sedang di bagian jang paling blakang ada terdapat satoe taman jang loewas djoega dan indah; tapi saanteronja ada dikeroeboengin oleh pagar pagar tembok jang tinggi dan tegoe. Giok Kay jang toeboenja masi blon tjoekop tingginja tjoema bisa liat itoe semoea dari kadjaoehan, hingga tida terlaloe terang dan njata; tapi dasaran ia ada satoe anak pintar, kabetoelan di sebelah kiri roemahnja Tjhio Tjoe Boen ada satoe poehoen gotong jang soeda toea dan sangat besar, ia liat di atas itoe poehoen ada satoe sarang boeroeng, maka dengen poera-poera maoe menangkap anak boeroeng ia naek ka atas poehoen terseboet, tapi koetika sampe di atas, dengen setjara tjerdik ia mengawasin kaadahan dalem roemahnja Tjhio Tjoe Boen dengen terliti sekali, hingga boleh dibilang sabagi djoega ia masoek sendiri ka dalem pekarangannja roemah itoe.
