-12-
apa toewan brani bilang tikoan dari Hwan gie tida bisa diandelin?"
Soeda tentoe sadja, Yo Kok Hiong tida mempoenjai boekti-boekti jang tegoe boewat perkoewatken iapoenja toedoehan itoe, maka ia tjoema berkata sadja:
„Dalem perkara jang tersangkoet sama oeroesan djiwa, satoe ambtenaar jang mendjadi sebagi iboe dan ajahnja rahajat, memang paling perloe didapetken saorang jang djoedjoer dan bisa mamegang betoel kawadjibannja, soepaja bisa mengasi keadilan pada fihak jang haroes mendapetken itoe, dan menghoekoem pada orang jang berdosa. Sedeng terhadep pada itoe tikoan dari district Hwan gie, sekali poen akoe tida bisa boektiken iapoenja perboewatan jang berat sabelah pada fihak terdakwa, tapi toch aneh sekali, mengapa koetika mantoe lelakinja akoe poenja boedjang prempoean madjoeken dakwahan itoe tikoan soeda menoelak dengen getas, malah berbalik toedoe mantoe lelakinja akoe poenja boedjang prampoewan telah madjoeken dakwahan palsoe ? Inilah ada satoe hal jang perloe ditimbang lebih djaoe, kerna sedikit banjak ada menjoerigaken dan tida sebagimana moestinja.
„Kaloe toean masi merasa penasaran, baeklah, akoe maoe panggil mengadep pada Tjhio Ijoe Boen boeat dipreksa lebih djaoe," kata Tjian Khong Hong, „dan kaloe toean soeka, boleh dateng djoega menjaksiken itoe papreksahan."
„Kaloe thaytjoen tjoema panggil Tjhio Tjoe Boen boeat ditanjaken katerangan sama sekali tida ada goenanja; tapi sabelonnja itoe haroes terlebih doeloe di bikin penjelidikan di Sip-lie-toen, soepaja bisa didapetken katerangan jang betoel atas doedoeknja ini perkara."
