-11-
Tjian Khong Hong dengen bersenjoem kasi oendjoeK satoe procesverbaal dari tikoan di district Hwan-gie, dalem mana ada di toelisken hasil papreksahannja itoe kapala district, boekan sadja Tjhio Tjoe Boen soeda moengkir dari itoe boedoehan, malah pada waktoe dibikin penggledahan di roemahnja tida bisa didapatken boekti satoe apa, dan mainja Giok Nio jang katanja telah bentoerken kapalanja pada tembok kamar tahanannja, djoega tida bisa di katemoeken.
„Dengen ini semoewa katerangan soeda tjoekoep mengasi kanjatahan bahoewa itoe dakwahan dari kaoe poenja boedjang prampoewan sama sekali ada djoesta", kata Tjian Khong Hong achirnja, „dan kaloe sadja ia itoe boekannja toean poenja boedjang, nistjaja sekarang akoe soeda toentoet ianja sabagi satoe orang jang bersalah lantaran madjoeken dakwahan palsoe."
„Tapi apa thayijoen tida bikin papreksahan dan penjelidikan sendiri?" menanja Yo Kok Hiong dengen pengrasahan mendongkol „Sebab, sabagimana soeda dibilang doeloean, itoe pembesar dari district Hwan-gie lebih doeloe memang soeda menoelak itoe dakwahan jang dimadjoeken oleh mantoe lelakinja akoe poenja boedjang prarnpoewan, maka dalem ini oeroesan tentoe ada terselip apa apa jang haroes diselidiken, dan itoe tikoan dari Hwan-gie sama sekali tida boleh terlaloe diandelin.
Tjian Khong Hong mendadak kasi oendjoek iapoenja sikap koerang senang dan dengen soeara bengis ia berkata: „Toean poenja omongan sasoenggoenja ada terlaloe gegaba! Kaloe satoe pembesar jang telah diangkat oleh firmannja keizer, biar poen ia tjoema ada satoe ambtenaar jang pangkatnja paling rendah, kaoe anggap tida bisa dipertjaja, pada siapa lagi orang boleh menaro kapertjajahan? Lagian dengen alesan
