-96-
Boe Tek tida merasa kaberatan sama itoe perdjangdjian, sebab ia sendiri memang tida mempoenjai toedjoean jang pasti. Moelai dari itoe waktoe ia tinggal di Lian-san dan bergoeroe pada Thio Eng Kim. Di waktoe beladjar ia mendapet satoe temen, satoe gadis ketjil jang beroemoer kira sembilan taon, anak prampoewannja Thio Eng Kim jang tjoema satoe satoenja dan sangat disajang, kerna iboenja sadari lama telah meninggal doenia. Sapoeloeh taon lamanja Boe Tek bergoeroe pada Thio Eng Kim, boekan sadja ia bikin kamadjoean dalem iapoenja ilmoe silat, berbareng dengen itoe ia bikin kemadjoean djoega dalem pertjintahan sama itoe gadis ketjil jang semingkin lama djadi semingkin besar dan achirnja mendjadi satoe gadis jang eilok. Inilah Thio Kioe Nio, jang kamoedian mendjadi istrinja Boe Tek, kerna Thio Eng Kim poen satoedjoe boewat ambil mantoe pada Boe Tek.
Di taon jang kasebelas, baroe sadja Boe Tek menikah pada Kioe Nio kira kira satengah taon, Thio Eng Kim telah begal satoe rombongan orang dagang jang maoe poelang ka Koeilim, sahabisnja berdagang dari Kongtjioe. Apa maoe kabetoelan ada Tiang Bie Ong jang toeroet djalan sama-sama, kerna ia poen ada kaperloean boewat pergi ka Koei-lim. Itoe djago silat kolot dengen sabar memboedjoek soepaja Thio Eng Kim djangan membegal, dan ia maoe kasi voorstel pada itoe kawan soedagar boewat saban orang mengaloewarken sapoeloeh tail perak sabagi oewang tjoeke; tapi Thio Eng Kim pandang enteng pada Tiang Bie Ong jang soeda beroemoer toedjoepoeloeh taon lebih, dan berkeras maoe membegal djoega, achirnja djadi bertempoer sama Tiang Bie Ong. Tapi biar poen doeloean Eng Kim bisa permaenken pada Boe Tek seperti Koetjing permaenan tikoes, sekarang
