-97-
ia sendiri jang kena dipermaenken oleh Tiang Bie Ong. Sasoedanja berdjalan limapoeloeh djoeroesan lebih, Eng Kim tida maoe mengarti dan menjerang teroes dengen mengaloewarken iapoenja ilmoe hong see-tjhioe jang ia sanget andelin, tapi Tiang Bie Otig tangkis itoe serangan dengen adem, hal ini boekannja membikin Eng Kim djadi mendoesin, hanja teroes menjerang sama ilmoe ilmoe jang samatjem itoe, seperti tiat see tjhioe kim no tjhioe dan hek see-tjhioe, jang semoewanja bisa membawa kamatian, kaloe sadja lawanannja boekan saorang jang mempoenjai ilmoe silat lebih tinggi, hal mana soeda membikin Tiang Bie Ong jang sabar djadi sengit djoega, laloe goenaken satoe tipoe kong thie-kam, menjengkerem lengen kanannja Thio Eng Kim hingga toelangnja mendjadi pata.
Mendapet itoe serangan boekannja ia djadi lembek sabaliknja menjerang samingkin seroeh sama tangan kirinja jang tida loeka, hingga Tiang Bie Ong lantaran gemas, tjoekil sabelah bidji matanja itoe kapala begal dengen ilmoe it-tji sian, baroelah ia djato roeboeh dalem kaadahan pangsan, Koetika Eng Kim sedar lagi dari pangsannja ia mendapat kanjatahan dirinja soeda menggletak di atas pembaringannja dengen diroeboengin oleh anak mantoenja sembari mengoetjoerken aer mata. Thio Eng Kim jang berhati keras tida maoe menangis atawa poen merintih, ia tjoema pesen sadja pada anak dan mantoenja soepaja kamoedian bikin pembalesan pada itoe orang toewa jang halisnja sanget pandjang, tapi ilmoe peladjaran jang sakarang marika soeda poenjaken, lida tjoekoep digoenaken boewa bertempoer sama itoe orang toewa halis pandjang.
Pada itoe malem djoega, Thio Eng Kim boenoeh diri dengen menggorok lehernja sendiri, sebab ia
