- 40 -
sekali soeda lama tida ketemoe, sekarang ketemoe tjoema sebentaran sadja lantas moesti berpisa kombali.
Kemoedian Tjan berdoea Bok Darmi doedoek itoe deeleman dari Ong menoedjoe ka station.
——————
IV.
Itoengan jang teroes.
Tempo Soekmi tjoetji piring bekas Tjan makan itoe nasi goreng, Wardji bininja koesir, saorang prampoean stenga toea, memanggil dia dan bilang nanti kaloe soeda ia maoe ada omong satoe apa.
Soekmi djadi heran, tida sari sarinja Wardji omong begitoe, kaloe ia maoe omong, toch boleh lantas omong sadja. Lantaran itoe, ia djadi kepengen taoe, apa jang ia maoe omongin.
Serta soeda abis tjoetji piring, Soekmi doedoek dibale bale bamboe diseblanja Wardji dan dengen tersenjoem ia tanja, ada omongan apa.
Wardji sekian lamanja awasin moekanja Soekmi, kemoedian ia kata seperti memaen:
„Mi, akoe tida mengarti, kenapa itoe tetamoe makan disini soeroe kowe jang masak? Toch diroema tauke djoega di sediain seperti biasanja?"
Mendenger begitoe, moekanja Soekmi beroba
