- 20 -
berpoera-poera, itoe djoega tida betoel, sebab Soekmi sampe taoe, jang Tjan hanja tetamoe dari Oey dan tinggal boeat satoe doea hari sadja disitoe, perloe apa ia moesti berpoera-poera pada orang seliwat? Kaloe a maoe bawa adat poera-poera, toch paling betoel ia boleh berlakoe begitoe pada Oey Sie Hoen.
Dari sebab begitoe, Tjan dapet timbang dengen betoel aken adatnja Soekmi dan ia merasa betoci-betoel prampoean begitoe haroes dihargaken.
Sekarang timboel ingetan dalem hatinja, ia berniat sendiri aken dapetken Soekmi dan boekannja boeat permaenan seperti apa jang Oey niatken, hanja boeat sesoenggoenja, di piara dengen baek.
Tjan merasa dalem hati, pemandangannja Soekmi padanja dan pada Oey ada laen, boleh djadi Oey tida dapet liat itoe, tetapi Tjan sampe mengarti, ja, mata itoe ada katja hati, tida bisa sala lagi, menoeroet ia poenja perasaan kendati tjoema seliwat dan entjer, hatinja Soekmi ada ketarik padanja.
Orang djangan kira tjoema orang prampoean sadja ada poenja perasaan jang aloes tetapi lelaki djoega, kaloe sadja mata hatinja tida boeta. Begitoelah matanja Tjan ada melek betoel.
