— 63 —
soewara lema-lemboet boeat memboedjoek hati anak prampoeannja. [1]
Si Manis denger ini adjaran dengen hati girang, kerna la poen lagi berpikir, tjara bagimana ia bisa membikin Babanja djato hati padanja, tapi pikirannja si Boto, jang lagi berdiri di samping dan mendapet denger semoewa pembitjarahan dari ia poenja iboe; ada sebaliknja; hatinja itoe gadis, jang poeti bersi, rasanja seperti di toesoek-toesoek djaroem, kerna ia merasa hina sekali, djika satoe prampoean baek-baek misti berlakoe pada soewaminja sebagi satoe boenga raja. Ia pembatja djangan boeat heran, bahoewa pikiran si Boto ada berbeda djaoe dari ingetannja si Manis sebagi Langit dan Boemi, kerna ini gadis ada mempoenjai kebedjikan, tida seperti ia poenja 'ntji jang maoe lantes djadi senang dengen djalan jang sala.
,,Apa Memeh soeda panggil wajang dan moesik ?" tanja si Manis jang ingin hari kawinnja di rajaken dengen rame.
,,Ala koedoe-koedoe panggil moesik dan wajang, asal kita oendang sobat ande dateng doedoek makan-makan. soedalah! Lagi oewangnja goea soeda kena kalain maen seratoes roepia, sama boeat ongkos Taon Baroe lima poeloe roepia, djadi tjoema ketinggalan shapek djigo toen lagi !"
,,Engga Meh ! kaloe Memeh maoe bikin sepi-sepi, Manis engga maoe kawin da!"
,,Loe seperti anak ketjil sadja !"
,,Abis Manis maloe dong sama temen-temen !"
- ↑ Lebi baek itoe iboe doerhaka lekas di panggil oleh Giam Lo Ong, soepaja ia tida membikin roesak ia poenja anak-anak prampoean dengen pengadjaran djelek, kerna perkara begitoe teroesa djoega di adjarken: NATUUR nanti bisa membikin orang prampoean taoe, tjara bagimana ia moesti menjinta pada soewaminja dengen setjara sopan boekan seperti Entjim Asie telah adjarken ia poenja anak prampoean.
