— 62 —
permata jang besar-besar seperti ia poenja bakal Baba, anak saorang hartawan.
„Nanti Entji rasaken, bagimana besar perbedaännja prihal kesenangannja orang jang djadi bini kawin sama orang jang djadi bini moeda !” kata si Boto jang hatinja djoega mendjadi panas, lantaran ketjintahannja di hinaken begitoe roepa.
„Eh! Manis! Eh, Boto! kenapa loe orang engga pasang itoe petasan, kan sajang-sajang doeit goea soeda bli!”
„Ja Meh! ampir saja djoega djadi loepa!”
„Manis! loe poenja oemoer sekarang soeda tamba satoe taon, maka loe moesti dapet pikiran jang lebi pandjang, kaloe Baba loe katain loe djangan melawan, kendatipoen loe engga sala, sebab orang jang sabar, engga ada lawanannja. Dan goea maoe bilangin djoega, loe djangan terlaloe olo-olo, kaloe Baba loe dateng, loe misti tanja, apa dia soeda makan, dan toewangin thee, bawa keloear koewee-koewee minta Baba loe dahar. Loe selamanja misti doedoek di sampingnja sadja, djangan loe tinggal-tinggal ka laen tempat. Kaloe loe mengomong djoega, misti di sertaken senjoem jang manis dan moeka jang terang, soepaja loe poenja Baba liat loe poenja roepa engga boleh djadi bosen. Dan loe engga boleh melantjong kamana-mana zonder minta permissie doeloe, soepaja dia tida djadi tjemboeroean pada loe, dan djoega loe engga boleh terlaloe galang-goeloeng sama tetangga terlaloe rapet, sebab kaloe loe poenja baba dateng ada tetangga di roema loe, dia djadi merasa koerang senang. Kaloe dia adjak masoek ka kamar......... loe djangan berlakoe seperti orang jang oga-ogahan, sebab itoe perboeatan boleh membikin dia djadi tida begitoe tjinta padaloe. Inget betoel-betoel goea poenja perkatahan, kaloe loe maoe djadi beroentoeng!” kata sang iboe dengen
