― 64 ―
„Ja da goea nanti panggilin moesik dan wajang tjokek.“
Lantaran hari kawinnja si Manis soeda deket, itoe doea gadis tida mendjoealan kopi lagi, kerna ia orang misti berkerdja di dalem roemah aken bikin persediahan boeat itoe pesta kawin.
Pada tanggal Tjia Gwee Tjego pagi, seblonnja trang tanah, di roemah Entjek Asie soeda kedengeran soewara trompet dan Pat-im, kerna si Manis jang djadi Nona penganten di itoe waktoe lagi,,tjiotauw."
Itoe Nona penganten telah doedoek di satoe krosi Hak Soele dengen pakean setjara kemanten Tionghoa, sedeng Emmah Tjomblang ada berdiri di sampingnja, sembari pegang sisir, berpoera-poera sebagi orang jang lagi hendak riasken Nona penganten.
Sasoedanja bersoedjoet pada Toean Allah jang Maha Koewasa dan sodja aboe laloehoernja, itoe Nona kemanten masoek lagi kedalem, dan itoe tetaboean di kasi brenti.
Djem delapan pagi, kawanan toekang tangkep koetjing jang kenal baek pada Entjim Asie telah dateng ka itoe roema beroentoen-roentoen dengen membawa barang bingkisan boeat kasi persen pada Nona penganten, dan kemoedian iaorang gelar tiker aken doedoek maen kartoe.
Soewara moesik sebentar-bentar ada terdenger dengen rioe sekali; semantara wajang tjokek menjanji segala matjem lagoe dengen teranter oleh tetaboeannja ia-itoe gambang teehian, soeling dan laen-laen sebaginja, jang kedengerannja ada sanget merdoe.
Djem anam sore, sekalian tetamoe-tetamoe semoewa pada brangkat poelang ka masing-masing poenja roema, katjoeali ampat pementopan jang masi getol adoe peroentoengnnja diatas tiker.
Entjim Asie poen ada doedoek berdjoedi sama-sama boeat
