― 25 ―
„Kenapa Engko boleh kata begitoe si !”
„Sebab selagi Engko ikoetin, nona roepanja alim betoel, lebi-lebi dari satoe padri prampoean !”
„Abis saja blon kenal si sama Engko!”
„Kaloe sekarang Ros kenal dong!”
„Sekarang si saja soeda kenal sama Engko jang tjakap!”
Sasoedanja si Ros pindaken semoewa pakeannja didalem lemari, ia laloe maoe kaloear dari itoe kamar, tetapi soeda di tjega oleh itoe anak moeda, sembari berkata: „Kita reba-rebahan adja Ros disini.”
Si Ros doedoek di pinggir pembaringan, sedeng Babanja pergi toetoep pintoenja itoe kamar potong, dan si Mina jang lagi doedoek di loear dapet denger pintoe „kamar potong” di rapetken, ia laloe berlaga batok batok sekedar boeat menggoda pada itoe doea orang moeda.
„Koh! liat toe, itoe Bibi, dia berlaga batok-batok !”
„Ja! memang si toea bangka soeka menggoda!”
„Dia bilang dia djadi Engko poenja baboe tete. Apa betoel begitoe?”
„Boekan dia, tetapi nona Ros jang djadi saja poenja baboe tete !”
„Engga bisa, Koh!”
„Do, djangan begitoe dong !”
„Hai, sama djoega saia djadi kemanten lagi, kaloe tidoer di randjang jang klamboe dan seprenja masi baroe !”
„Memang djoega nona djadi kemanten baroe lagi, pan baroesan kita soeda kawin !”
„Bisa adja 'ngko, masa Koh tjinta si sama saja orang djelek!”
„Kaloe Engko engga tjinta, masalah Engko soeroe si Mina minta ?”
„Sekarang sadja Engko tjinta saja, nanti kaloe Engko soeda bosen tentoelah saja di sepak!”
