— 22 —
entjek Asie, si Boto, jang memang maoe menoenggoe liwatnja itoe kandaran didepan roemanja, masi ada di loear, maka itoe gadis laloe membri slamat djalan pada ketjintahannja boeat pengabisan kali dengen gojang-gojang tangan, dan Keng Hok poen telah bales dengen kiber-kiberken ia poenja sapoe tangan, baek djoega di itoe waktoe Keng Hok poenja ajah tida memandang ka itoe djoeroesan.
Kita rasa tida begitoe perloe boeat toetoerken teroes perdjalanannja ini anak moeda, baeklah kita adjak pembatja meliat pada si Ros, jang kita soeda tinggalken padanja, sedari ia brangkat dari roema orang toeanja.
VIII.
KWALI KETEMOE KEKEP.
Pada soewatoe pagi di Gang Semoet ada brenti satoe deeleman preman, jang tendanja ada tertoetoep rapet sekali ; satoe Nona moeda jang berparas eilok bersama satoe prampoean toea soeda toeroen dari itoe kandaran dan soeda masoek didalem sala satoe dari itoe roema jang ada didalem itoe gang,
Itoe Nona moeda, adalah si Ros, sebegimana pembatja tentoe bisa dapet tebak dan itoe prampoean toea, ada boedjangnja itoe Baba moeda jang lagi menoenggoe di kamar potong." [1]
- ↑ Kita kasi nama,,kamar potong" sebab itoe kamar ada digoenaken sebagi satoe djagal kerbo jang setiap waktoe ada dipake boeat potong kerbo [ja-itoe nona-nona jang beroepa tjantik, tetapi tida ada poenja kebedjikan, maka itoe kita kira ada soeroep sekali, kaloe kita namaken iaorang binatang kerbo, kerna ia orang poenja pikiran ada sanget pendek, hingga ia orang telah tjemarken diri dan selaloe maoe plesir poeas-poeasan pada waktoe moeda, tetapi ia orang tida maoe pikir, bagimana nanti djadinja marika poenja diri di kamoedian hari!]
