— 21 —
antjoer hatinja dari itoe doewa orang moeda, koetika ia orang maoe berpisa satoe sama laen, lantarn hatinja orang lelaki ada lebi koeat dari pada orang prampoean, maka Keng Hok poenja roepa tjoema keliatan seperti orang jang bersedi, tetapi si Boto soeda menangis tersedoe-sedoe didalem itoe waktoe ia orang berdoewa baroe mendapet taoe, begimana besar ia orang poenja ketjintahan satoe sama laen dan si Boto maskipoen telah mengoetjap perkatahan: „slamat djalan !” tetapi blon djoega maoe lepas orang poenja tangan, sedeng kakinja Keng Hok poen tiada bisa bergerak boeat bertindak, maka Keng Hok maskipoen ia ada begitoe sanget sedi di itoe waktoe, masi bisa inget jang ia poenja tempo ada sanget pendek, maka dengen terboeroe-boeroe ia berdjalan poelang ka roemahnja.
„Kita brangkat sekarang sadja Hok, sebab lebi baek kita menoenggoe sedikit lama, dari pada moesti terboeroe-boeroe bli kartjis dan naek kreta api. Goea lagi soeroe boedjang panggil sado,”
„Owee Tjek, baekan djoega begitoe,” kata Keng Hok, laloe masoek ka dalem kamarnja dan angkat kloear semoewa barang barangnja.
Tida bebrapa lama poelah sado jang di panggil soeda brenti di depan pintoenja.
„Bang, toeloengin angkat ini koffer ka sado !” kata Keng Hok pada itoe toekang sado.
Itoe toekang sado lantes toeroen dan angkat itoe barang-barang dan taro di sadonja.
„Eh! Siti loe toenggoe di loear sadja !” kata ajahnja Keng Hok jang maoe koentji pintoe, kerna ia tida pertjaia betoel pada boedjangnja boeat djaga ia poenja waroeng. Sasoedanja koentji pintoe, ia orang laloe doedoek didalem itoe kandaran jang lantes di kasi lari menoedjoe ka station.
Koetika sadonja Keng Hok liwat di depan roemanja
