Tjerita-tjerita dari negeri Atjee/PERANG DI SOERIAN.
Kota-Radja. Di sini patroeli itoe berhenti lagi dan dapat makan. Poekoel anam malam patroeli ini soedah koembali lagi di Lambaroe, dan di sini dija di terima dengan soerak-soerak.
Kaptin Bode itoe, di mana di dapat lihat, disoeraki sadja.
Sedikit hari di belakang dija di obati toewan doktor, sebab kapalanja tempo perang itoe kena loeka. Tempo perang dija tida maoe bilang itoe pada soldadoe-soldadoenja. Tahon 1886 toewan kaptin Bode terima bintang tandjong.
PERANG DI SOERIAN.
26 Juli 1874.
Kampong Soerian itoe ada di sebelah kidoel dari djalan besar dari Oleh-leh ka Kota-Radja.
Moesin oedjan, kaloe ada ajer besar di kali Atjee, djalan itoe di pakej oleh transport-transport. Selamanja transport-transport ini kaloe djalan, di pasang moesoh. Djadi bagitoe toewan djendral Pel maoe oesir moesoh dari kampong Soerian, lantas bikin benteng di sitoe. Di kampong Soerian itoe ada banjak benteng benteng bedjedjer-djedjer. Moesoh itoe kiranja kita tida maoe ambil kampong itoe; djadi banjak benteng-benteng itoe tida ada orang-orangnja.
Ini djoega soedah di periksa oleh satoe patroeli dari Blang-oë.
Djadi bagitoe, kiranja toewan djendral Pel, kampong itoe bajik di ambil sekarang.
Djam poekoel ampat pagi-pagi ada djalan satoe kolono di kommandeer oleh toewan majoor Grroos. Kolono ini koewatnja separoh bataljon tiga, doewa marijam dan orang minoeran. Kolono itoe pegika Blang-oë; di sini nanti di bikin satoe dengan doewa kompeni dari bataljon doewa, di perintahi oleh toewan major Phaff.
Poekoel anam pagi kolono itoe sampej di tempatnja, lantas di bagi doewa. Satoe bahagian nanti misti perang, dan bahagian jang lajin djadi reserp. Reserp ini, jang koewatnja satoe kompeni setengah, nanti tjari tempat di Blang-oë; Reserp di perentahi toewan major Groos. Kolono jang lajin, di perentahi toewan major Phaff. Kolono ini di soeroh ambil kampong Soerian.
Toewan Djendral Pel memerentah semoewanja.
Poekoel setengah toedjoe merijam soedah moelai pasang. Poekoel toedjoe selompret boenji voorwaarts, dan kolono itoe madjoe.
Voorhoede itoe ada satoe kompeni, doewa merijam dan orang minoeran.
Yoortroep itoe, jang di perentahi littenan satoe, namanja van der Zee, ada satoe onderopsier belanda dan aprikan, delapan soldadoe belanda dan delapan soldadoe aprikan, dan lagi ada djoega minoeran.
Djalan itoe soesah sekali, dari apa banjak pagar-pagar. Pagar-pagar ini misti di potong dahoeloe, djadi kita ini madjoe pelahan sekali.
Lama-lama kita sampej di kampong Tjot-aroem. Lantas, tempo kita soedah liwat kampong ini, kita dapat lihat kampong Soerian. Di antara kampong kampong ini ada soewatoe sawah, lebarnja ada seratoes elo.
Opsier-opsier itoe oendjoek kampong Soerian pada soldadoe-soldadoe. Soldadoe-soldadoe ini lantas soedah mengerti.
Voorhoede itoe di soeroh liwat sawah; betoel di pasang; tetapi sampej djoega di pingirnja kampong Soerian, dan di sini ketemoe pagar. Soepaja hoofdtroep itoe boleh liwat sawah, merijam-merijam itoe moelai pasang, sampej hoofdtroep ini djoega sampej di sebrang sawah. Minoeran itoe moelai bikin lobang di pagar. Lantas, tempo soedah ada lobang, voortroep itoe madjoe, tetapi ketemoe lagi satoe pagar, lebeh besar lagi dan lebeh koewat. Dengan banjak soesah di sini di bikin lobang djoega, tetapi, baroe voortroep itoe soedah tersiar dan madjoe, lantas di pasang oleh moesoh.
Tida bagitoe banjak orang jang kena pelor, dan lagi voortroep itoe sampej di satoe tanah lapang, ada lima poeloeh elo pandjangnja dan lima poeloeh elo lebarnja. Di sebelahnja tanah lapang ini ada satoe benteng; koelilingnja ada pagar bamboe doeri, dan kanan kiri ada lobang-lobang di mana ada orang Atjee, jang pasang kita orang.
Djadi bagitoe, tempo voorhoede soedah rapat dengan voortroep, semoewa madjoe dongan looppas.
Toewan littenan van der Zee tjoba toebroek benteng itoe dari belakang, kiranja barangkali dari sini lebeh gampang.
Tetapi di sini ada pagar djoega dari bamboe doeri. Littenan itoe lantas tjoba masoek di pagar; dija djalan merangkang dan pedangnja di seret dengan koewasnja di gigit; tida pedoeli doeri-doeri itoe.
Tangannja dan moekanja loeka semoewa, tetapi dija sampej di benteng itoe. Lantas di sini dija meloempat najik di atas. Tempo dija tengok ka belakang, dija lihat tida ada satoe orang mengikoet dengan dija. Semoewa orang masi ada di moeka pagar itoe, sebab soesah masoek dari apa bawa senapan dan barang koelit.
Ada satoe onderopsier belanda, katanja: littenan, toeroen, kita orang tida bisa toeloeng. Tetapi littenan itoe tida maoe toeroen, maski di pasang, maski maoe di boenoeh dengan toembak dan klewang. Dija toenggoei moesoeh dengan pegang pedang di tangan kanan dan kistoolnja di tangan kiri, satoe-satoe kali pasang, satoe-satoe kali poekoel, djatoh satoe moesoh.
Toewan kaptin Perelaer sekarang ini soedah datang djoega sama orang-orangnja. Dija lihat littenan itoe, lantas dija maoe toeloeng, tetapi tida bisa. Lantas dija beterejak, soeroh toeroen littenan itoe; tetapi littenan ini tinggal bederi sadja bekelahi; tida maoe moendoer.
Littenan itoe soedah kena klewang lehernja, dan kena toembak dadanja, dan kena pelor kakinja, tetapi belom djoega maoe moendoer. Lantas tangan kirinja kena di pasang; djadi djatoh kistoolnja, tetapi dengan pedangnja sadja sekarang dija tinggal bekelahi. Lama-lama littenan itoe tida bisa tahan lagi. Dengan pedangnja dija masi tangkis senapan jang di intjer pada dija. Lantas kena pelor dadanja, sekarang dija djatoh, bajiknja di loewar benteng. Topinja dan kistoolnja dan pedangnja ketinggalan di dalam benteng.
Sebentar orang Atjee itoe loempat kaloewar dengan soerak; maoe ambil itoe littenan; tentoe maoe di tjintjang. Tetapi soldadoe-soldadoe bajiknja ada di sitoe, sebab sekarang itoe minoeran soedah bikin roeboh itoe pagar. Littenan itoe lantas di angkat, di bawa ka belakang.
Katanja satoe orang aprikan kapada orang Atjee itoe: djangan ketawa, nanti koewe rasa, bangsat.
Dari benteng itoe dija di pasang, tetapi topinja sadja kena. Tjoba selompret tida boenji moendoer, tentoe orang aprikan itoe soedah loempat masoek di benteng.
Toewan kaptin Perelaer ini, kiranja pertjoema benteng itoe di toebroek, sebab terlaloe sedikit orangnja; djadi bagitoe dija moendoer sedikit, lantas orang orangnja di soeroh tjari tempat betoel, dan siapa siapa kelihatan di benteng di soeroh pasang. Bagitoe roepa dija toenggoe hoofdtroep, akan toebroek sama-sama.
Lantas bagitoe hoofdtroep itoe sampej di pagar. Kompeni jang di moeka di soeroh atakeer, tetapi soesah sekali itoe, sebab banjak pagar dan randjoe randjoe tahan akan dija. Djadi kompeni itoe misti moendoer dan rapat lagi pada kolononja toewan kaptin Perelaer.
Soldadoe-soldadoe jang lajin itoe, sekarang soedah kepoeng benteng itoe. Dija orang ini semboeni badannja di belakang galangan-galangan dan barang-barang lajin, dan banjak orang Atjee di pasang dari sini sampej mati. Banjak djoega orang di boenoh pelor merijam.
Ada orang-orang minoeran itoe, di perentahi soewatoe littenan, di soeroh rombak barang-barang itoe jang tahan pada soldadoe-soldadoe, soepaja boleh atakeer benteng itoe.
Pekerdja-an ini di bikin dengan patoet.
Sahabisnja pekerdja-an ini, moesoh itoe di soeroh serahkan dirinja; tetapi dija menjahoet dengan makimaki sadja. Soedah tentoe soldadoe-soldadoe ini panas hatinja. Apa lagi orang aprikan itoe. Tjoba tida di tahan oleh opsier-opsier, tentoe dija soedah madjoe sendiri.
Lantas bagitoe katanja kolono-kommandan itoe pada selompret: Selompret: boenji atakeeren. Selompret-selompret jang lajin itoe belom boenji atakeeren djoega, lantas soldadoe-soldadoe soedah madjoe, tinggal toebroek sadja benteng itoe. Orang orang aprikan itoe soewaranja lebeh keras dari selompret.
Semoewa orang najik benteng itoe, dan toebroek itoe orang Atjee, jang ada di dalamnja.
Di moeka sekali ada opsier-opsier. Bekelahi itoe sekarang satoe dengan satoe. Koeliling riboet, kedengeran poekoelan klewang dan pedang dan senapan, jang di pakej bikin poekoel sadja. Kiri kanan kedengeran soerak dan beterejak.
Lama-lama bagitoe semoewa orang Atjee di benteng itoe soedah di boenoh. Tjoema satoe orang jang lari. Di tanah itoe penoeh orang mati. Banjak kepala-kepalanja orang Atjee soedah mati. Kita djoega ada jang mati dan loeka. Jang loeka ada ampat opsier, dan dari soldadoe-soldadoe itoe jang mati dan jang loeka ada lima poeloeh ampat orang.
Toewan kaptin Perelaer itoe amat beraninja. Dija ini tjoba bikin petja pintoenja benteng itoe dengan kampak. Dija ini tida pedoeli dija di pasang. Ada satoe Sersan jang toeloeng sama dija.
Ada satoe toewan major dari setablan, namanja van Zijll de Jong, jang sekarang djadi legerkommandan, ija mitar sendiri marijam-marijam itoe.
Ada satoe adjidan onderopsier, dija ini, tempo bandoel jang dija pegang di pasang sampej pata kajoenja, tingal bawa bandoel itoe, sampej dija djatoh, kena pelor dadanja.
Toewan littenan van der Zee itoe, jang soedah kena loeka banjak, lama sekali tinggal di roemah sakit, tida dapat di obati. Lantas bagitoe dija di soeroh pigi ka negeri belanda, lantas di sini dija djadi bajik, tetapi tida bisa pegang diesnja militer lagi. Banjak sekali orang jang dapat bintang tandjong.